A+ A-

Ver di u 1380 Leonello Lomellini, unu di i ripresentanti di Genuva in Corsica, decide di fà custruisce una bastia nantu à un prumuntoriu à 10 chm à u nordu di a sede lucale di u putere genuvese. Presenta parechji avantaghji issu impiazzamentu novu : si pò difende faciule, è si trova trà duie cale naturale prupizie à sbarcà. D’altronde, puru ch’elle dipendinu e cale di i paesi di Cardu è di Belgudè chì si ne ghjovanu di marine, à nantu à l’elpa ùn ci stà propiu nimu. E prima sale di u museu cercanu di purtà u visitante à vede cum’ellu si hè fattu u sviluppu di a cità ingiru à e so duie prima vucazione : offre un postu di ripiegu à u putere s’ellu nascessi qualchì cunflittu è assicurà una prutezzione efficace di u cumerciu marittimu.

Di fattu, un seculu dopu, nasce una piccula cità vicinu à a bastia. Toccu a fine di u 15u seculu, sò arrizzati i rampali in lu pralongu di u primu accintu furtificatu. Issa terra nova, custrutta longu à e strette chì l’acquadritteghjanu, hà tandu da piglià u rangu di capitale, sendu u solu locu ufficiale di residenza di u guvernatore. Più sottu, for’ di muri, a cità aperta, chjamata terra vechja, per via ch’ella hè stata impiantata prima, hà da cresce anch’ella allarghendu si à pocu à pocu ingiru à u portu.

Issa prima tematica cerca à spiegà l’evuluzione urbanistica è architetturale da u 15u à u 20u seculu, caratterizata da a pregnenza di a inturnianza naturale chì ricinghje a cità trà mare è muntagna, è da una espansione urbana intravata un bellu pocu da u sviluppu più o menu urganizatu di a cità suttana.

Si porta una primura particulare à i dui quartieri chì sò i nudelli di u centru storicu di a cità : Terra Nova è Terra Vechja, visti ugnunu sicondu a so funzione maestra u sistema di difesa di a cità è l’assesti purtuarii.

Capitale pulitica, prestu Bastia sarà a principale capitale religiosa di l’isula, cù a creazione sopra à locu d’uni belli pochi d’edifizii cultuali.
Fendu vene i maestri d’opera da Terra ferma (cuntinente talianu), i cumanditarii anu faciulitatu a ghjunta in Corsica di l’architettura barocca. U visitante pudarà scopre à tempu un panorama di l’edifizii i più significativi chì si ponu vede sempre avà, è l’evucazione d’uni pochi di casamenti oghje spariti.

L’architettura privata anch’ella palesa issa influenza taliana chì firmerà presente bellu dopu à u rattaccamentu à a Francia. Non solu marca u stile è l’urganizazione di l’alloghju, ma dinò l’ambiu di vita d’ogni ghjornu chì ne sò a prova l’elementi di decoru, di mubiglia è di stuvigli presentati ind’ì l’ultime sale di u par’di terra.


Naissance et croissance urbaine

Le coeur historique de Bastia : Terra Nova et Terra Vecchia

L'architecture religieuse bastiaise

Le cadre de vie urbain au 17e siècle